كان ياما كان

كان ياما كان.. مش ايام زمان.. دى فى الايام اللى احنا فيها وياريتنا ماكنا فيها

ليا واحد زميلى فى الشغل كان قاعد سرحان ومهموم قلت له مالك قاعد حاطط ايدك على خدك كده وموهوم

قال لى سيبنى فى حالى انا مش ناقصك ياعم المرسوم قلت له طيب ليه الغلط بأااااا

قالى وحياة ابوك سيبنى فى حالى .. قلت له والله مانا سايبك الا ماتأولى في ايه؟ قال الواد ابنى يااخى .. ماله.. مغلبنى .. وفيها ايه ياعنى .. ماهى الولاد كلهم مغلبين اهلهم.. قالى ابنى حاجه تانيه . الواد ياسيدى عاوز يجوز.. وفيها ايه دى كمان ماهى حاجه طبيعيه هو مش كبير؟ وسنه سن الجواز؟ متجوزه ... اجوزه ؟( قالها باستهجان) اجوزه؟ منين وازاى يافالح؟ مانتا عارف المرتب مابيكفيش رغيف العيش.. قلت له خلاص يبقى يصبر لحد ماتُفرج ..تفرج ازاى اذا انا لسه بسدد فى اقساط جهاز البت اخته وياعالم هتعدى على خيرولاااا... وسَهمْ وشرد بذهنه.. وقال ربنا يسترها.. (هو طبعا متكتف بوصلات امانه ) قطعت عليه شروده وسرحانه.. وقلت له الااا هوابنك بيشتغل ايه ؟ قال لاشغله ولا مشغله هو خلص البكالوريوس بأااالوسنين وقاعد.. قلت له شَغله .. قالى اشتغل حاجات كتيروالله.. ايشى نقاش. وايشى ميكانيكى .وحاجات تانيه كتير ومش نافع يااخى يعنى بيجيب كام ؟ .. قلت له من النهايه ... انه مش لاقى اللى يجوزه ويعيشوا عيشه محترمه .. قالى ياريت جات على كده وبس ..قلت له فيه ايه تانى .. قالى اللى زاد وغطى انه اليومين دول طالع فى موال غريب وانا خايف عليه ..قلت له ايه تانى ..قال لى بيتأخر كتيرباليل ..طيب ليه متفهموا ان مافيش احسن من الالتزام .. كمل قال

لأيته ياسيدى بيأعد باليل حتى الفجر مع جماعه من اللى همه ملهمش سيره غير انهم يكلموا فى السياسه وفى الظلام ...قلت له ابنك كده وصل للحل من غير مايتعب نفسه .. ازاى بأااا ياخويا نورنى والنبى.. قلت له .. الله ! هو انته متعرفش ؟ ان فيه ناس فى البلد دلوقتى محظورين بتاجلهم فلوس متعرفش منين؟.. قال لى يعنى (وطبعا هو مش فاهم انا اقصد ايه .اضغط هنا وانت تعرف انا اقصد ايه) والناس دى كويسه ؟ قلت له ا للــــــــــــــهُ اعلم .همه لو يقصدوا وجه الله والوطن يبأوا كويسين

بس لوحاجه تانيه يبأااا ربنا يسترها عليه وعلى البلد كلها ... وانتهى الكلام ومشى من غير سلام